Муцунски во интервју за Курир: Имаме Влада за која важи принципот „Ќе ги почитуваме законите, но нема да ги применуваме“

Интервју за КУРИР на Меѓународниот секретар на ВМРО-ДПМНЕ, Тимчо Муцунски.

КУРИР: Најактуелни теми во периодов се судските процеси и најавата за предвремени избори. Колку овие два процеси можат да си влијаат самите на себе, односно судските одлуки за скандалите дали може да влијаат на изборните резултати?

-Тоа е една актуелна тема која што ја засега нашата земјаод својата независност. Како можеме да ги решиме тие хронични проблеми со корупција, со злоупотреба на службена положба кои што постојат во правосудниот систем. Ова е само една крајна рефлексија на сето тоа што се случуваше последните 30 години, но веќе достигна еден степен на неподносливост и разбуди навистина голема страст кај граѓаните. Посебно последните случувања со „Рекет“. Жалосно е што во последниве три години имаме Влада која што декларативно вели дека ќе се бори со проблемите кои што ги има во правосудниот систем, но во пракса ниту во измена на закони ниту во правосудна практика не гледаме никакви подобрувања, напротив, гледаме влошувања на состојбите. Тој нивен целокупен однос кон уставот, кон Правниот систем. Велат „Ќе ги почитуваме законите, но нема да ги применуваме“, „Ќе ги почитуваме препораките на највисоките меѓународни институции, но нема да ги применуваме истите“. И што значи тоа? Вие го рушите правниот систем, создавате енормно неправо кое што најмногу го удира обичниот граѓанин, а гледаме дека иако се залагаат за многу висока транспарентност, кога треба врз основа на јавно достапни информации, некој висок претставник на Владата да биде одговорен, правосудните институции молчат, Владата молчи, значи нема никаква одговорност. Ова ќе биде многу сериозна тема во кампањата бидејќи е една од најголемите теми што ја засегаат нашата земја. ВМРО-ДПМНЕ планира да стави еден клучен постулат на кампањата во процесот на реформа на правосудниот систем, но не само политикански да се изразуваме дека ЌЕ направиме промени, туку да предложиме конкретна методологија, конкретни мерки како може работите навистина да се направат подобри. Тоа е преку измена на законски акти, преку различни модалитети на надзор и обука, но исто така, почитувајќи ги секогаш највисоките стандарди на меѓународните институции и организации кои се релевантни да дадат препораки во таа насока. Така да, европеизацијата почнува од нас, но проблемот во нашата земја во правосудството е секој граѓанин кој ќе се потсети, кога ќе му дојде на размислување какво искуство имал тој со било која правосудна институција, јас ве уверувам дека огромно мнозинство ќе се потсетат дека имале негативно и лошо искуство. Без функционален правосуден систем и без ефикасна администрација, вие не можете во оваа земја да имате успешна економија. Веројатно, заради некои остатоци кои ги има од претходниот комунистички систем, но и заради енормната злоупотреба која ја имаат правено голем број на политички елити досега, ние системски не сме го решиле тоа прашање, но треба граѓаните да бидат убедени дека ВМРО-ДПМНЕ ќе превземе конкретни чекори и конечно ќе имаме правосудство кое ќе биде ефикасно, ефективно, транспарентно и ќе ги носи своите одлуки единствено со примена на квалитетни закони, анализира Муцунски.

ВМРО-ДПМНЕ веќе извесен период води теренска кампања „Обнова на Македонија“. Муцунски го предводеше тимот кој што беше во Берово каде изјави „Време е оваа држава да добие Влада која ќе биде фокусирана на реформи“.  Неговата оценка за тоа каква е оваа Влада и зошто е потребна промена можете да ја слушнете во целосното интервју кое КУРИР го објавува во подолу.

КУРИР: „И покрај тоа што е сменето името на државата и на повеќе институции, граѓаните знаат дека се Македонци и државата им се вика Македонија„. Ова го изјавивте гостувајќи во грчката телевизија „Скаи“. Свесни сте за револтот кој постои кај македонските граѓани по уставните измени?

-Апсолутно сум свесен за тој револт бидејќи јас сум еден од тие револтирани граѓани кои мислат дека е направена огромна штета на македонскиот национален интерес, каде што ние сите сме навредени, нашата историја и нашите предци се навредени од еден таков однос и не само што сум свесен како што кажав, туку сум и еден од лицата кои што го чувствуваат тој револт и таа негативна енергија што произлегува од таквиот профил на слаба надворешна политика, која што е подготвена единствено да дава еднострани компромиси. И вие кога се насочувате кон еднострани компромиси, не постигнувате никаков успех, освен во оваа ситуација целосна навреда на Македонците во нашата земја. Јас навистина не знам како некои политичари со гордост изразуваат дека се од земја со некое ново име. Јас не познавам друга земја освен Република Македонија. Јас на тој грчки медиум го кажав тоа што единствено го чувствувам. Јас сум Македонец од Република Македонија. Сега гледаме дополнително се отвора дилемата за македонскиот јазик. Тоа се прашања што во XXI век, ако ние сакаме да ги движиме нашите земји напред, ниту помеѓу соседи, ниту помеѓу било кои земји не треба да бидат знак прашање. Прогресот е преку економија, преку дигитализација, а некој да ми го негира правото на идентитетско самоопределување е еден феномен кој што е страшно ретрограден  и јас, верувајте ми, никогаш во мојот живот, нема да дозволам така да биде, потенцира Муцунски.

Меѓународниот секретар на ВМРО-ДПМНЕ вели дека во Европа, па и пошироко, нема релевантен политичар кој не е тековно запознаен со сериозниот степен на корупција и злоупотреба на институциите кои ги имаме во нашата земја.

-Дел од нашата работа е примарно промоција на македонскиот национален интерес, а тоа е членството на Македонија во ЕУ и НАТО, но ние не смееме да ги негираме и да се однесуваме како да не постојат овие тенденции кои ги имаме во нашата земја. Нашите сограѓани се осиромашени, нашите институции не функционираат, политизацијата е навлезена во секоја пора од нашето општество. Имаме Влада која создава трибализам кој создава се поголеми поделби на политичка основа. Време е тоа да запре. Ние токму тоа ги информираме сите претставници на меѓународната заедница, дека новата Влада предводена од ВМРО-ДПМНЕ нема да биде Влада која ќе дојде единствено за да владее туку ќе биде Влада која што ќе дојде да управува за создавање на промени. И тоа ќе биде нашиот печат во македонското општество, нашиот политички печат различен од сето тоа што е правено до сега… Време е конечно да имаме еден чесен, одговорен и искрен пристап во политиката, да работиме во интерес на нашите граѓани и да создаваме промени кои што ќе ги натераат сите млади кои размислуваат да се иселат од нашата земја, да останат тука, но да размислиме за тоа дека огромен број најпаметни, најспремни, наједуцирани и најквалитетни луѓе кои веќе се иселени, треба да најдеме начин да ги убедиме да ги вратиме. Еден од начините е создавање на квалитетни работни места со високи плати, но исто така треба да се справиме со енормното загадување,  подобрување на состојбите со зеленилото, создавање на квалитетно образование, силен јавен здравствен систем. Сите тие мерки кои ќе ги соберете со стручен тим и квалитетни луѓе, тогаш знаете дека можете државата да ја движите на вистинскио пат, истакна тој.

Муцунски зборуваше и за Законот за јазици и неговите очекувања по мислењето на Венецијанската комисија, за обидот на СДСМ да избега од изборите, како и за подготвеноста на ВМРО-ДПМНЕ за Техничка Влада, програма и кампања.

WordPress › Грешка

The site is experiencing technical difficulties.