Христијан Мицкоски, претседателот на ВМРО-ДПМНЕ во интервју за Македонско радио изјави дека после се што видоа граѓаните од власта разочарувањето кај народот е огромно дека тој тоа го разбира затоа постојано е меѓу граѓаните за да изнајде решенија за нивните проблеми и затоа вели дека кога ќе се врати ВМРО-ДПМНЕ на власт ќе дојдат  подобри времиња во Македонија.

– Единствен начин тоа разочарување да се надмине е со директна комуникација со народот. Беше многу важно во првиот круг кога ја поминувавме Македонија да разговараме со поголем број на луѓе за да добиеме одредена навигација какви политики треба да водиме. Паралелно на тоа ја реконструиравме внатрешно партијата, сите оние внатрешни удари и внатре политички предизвици, надворешните политики, не беше за пофалба тогаш положбата на ВМРО-ДПМНЕ. Но, верувавме дека можеме, работевме и разговаравме со луѓе онаму каде што во минатото политиките на ВМРО-ДПМНЕ нанеле штета некому. Не ни беше тешко да побараме прошка кога навистина било тоа така. Онаму каде што видовме сведоштво за успешни политики на владите на ВМРО-ДПМНЕ истите тие ќе се обидеме да ги надградиме и прошириме и да ги обновиме со некои нови политики, потенцираше Мицкоски.

Тој истакна дека пред претседателските избори  два пати ја поминала државата преку средби и посети на граѓаните да се слушне секој еден граѓанин, а потоа и а време на претседателските избори, повторно кога низ кампањата се разговараше со нив, за да се ублажи разочараност и да им се даде надеж на граѓаните.

-Имавме транспарентна конвенција, претседателски кандидат по мене најдобар што некогаш се појавил како кандидат на политичката сцена, а бил кандидат за претседател на државата. Повторно ја поминавме и пред кампањата и по кампањата, еве и сега по петти или шести пат разговараме со луѓето, се обидуваме да им објасниме колку толку да им ја ублажиме онаа разочараност и изневереност која што е присутна. Морам да признаам дека е навистина акутна. И се надевам дека кај најголем дел од нив ќе успееме да допреме, да добиеме поддршка на следните предвремени парламентарни избори, нагласи Мицкоски.