Во градинките во Прилеп владее хаос, се врши мобинг, притисоци и сето тоа оди на штета на правилниот развој на децата

Интегрален текст од прес конференција за медиуми на Андријана Ристеска, советник на ВМРО-ДПМНЕ во Советот на Општина Прилеп

Почитувани,

СДСМ во досегашното владеење како на централно така и на локално ниво покажа дека освен хаос нема што да им понуди друго на граѓаните. Колку за потсетување во наше време инвестиравме во градинки и нов капацитет, па така беа отворени групи во ново адаптирани простории во неколку села како Тополчани, Беровци, Канатларци, Големо Коњари, објект во Општина Кривогаштани и нов адаптиран објект во состав на Работнички универзитет.

На овој начин се зголеми капацитетот за околу 300 нови места за престој на деца од предучилишна возраст. Исто така потсетуваме дека на сегашната локална власт и беше оставен од наше време речиси целосно адаптиран објект во состав на ООУ „Рампо Левката“ со средства обезбедени од МТСП, за чиј објект сегашната локалната самоуправа си ги препиша заслугите сама на себе. Моменталниот градоначалник, тогаш во улога на советник при Општина Прилеп кога на седниците се разгледуваше одлука за прием на поголем број деца во групите, беше против, со барање за преиспитување на гаранцијата за безбедноста на децата. Сега од улога на градоначалник нема ништо против ваквите одлуки, иако изјавата на директорот оди во насока дека е извршен прием на 1420 деца, што е за околу 250 до 300 деца повеќе од минатата година.

Прашуваме дали сега од една поинаква позиција може градоначалникот Јованоски и директорот, да ја гарантираат безбедноста на овие деца во градинките?

Исто така прашуваме, дали директорот самоиницијативно или во соработка со градоначалникот го намалува бројот на технички персонал, поточно хигиеничари и покрај огромниот број на примени деца, за кои патем нема побарано согласност од Општина Прилеп и покрај неговата законска обврска?

Токму хигиеничарките се тие кои се грижат за чистотата во објектите, и истите не треба да бидат прераспределени на други работни места како градинар, или секретарка на директорот.

Дали В.Д Директорот, поставува раководители со средно образование кои не работат во воспитни групи, а на нивно место се ангажираат лица преку проект, без соодветна лиценца која се бара согласно законот?

Вработените секојдневно се жалат дека во градинките владее хаос, се врши мобинг, притисоци и сето тоа оди на штета на правилниот развој на децата. Затоа оваа власт мора што поскоро да заврши со ваквиот експериментален, несериозен начин на работа кој се одразува негативно како на децата, така и нивните родители!

Поврзани вести

Најгоре